Encamên meha Nîsanê ya 'Lêpirsîna Sînorê Birçîbûn û Xizanî' ku ji alîyê Turk-Îşê ve her meh ji bo eşkerekirina şert û mercên jiyanê yên karmendan û ji bo tespîtkirina bertekên guhertina bihayê pêdivîyên bingehîn ên li ser budçeya malbatê tê lidarxistin, hatin eşkerekirin. Li gor hesabên hatine kirin; Mesrefa xwarinê ya mehane (sînorê birçîbûnê) ku ji bo malbatek ji 4 kesan pêk tê, xwedî xwarineke tenduristî, derket 5 hezar û 323 TL. Tevahîya (sînorê feqîrîyê) lêçûnên xwarin û lêçûnên mehane yên mecbûrî yên cil, xanî (kirê, ceyran, av, petrol), çûnûhatin, perwerde, tenduristî û hewcedarîyên bi vî rengî derket 17 hezar û 340 TL. 'Lêçûna jiyanê' ya xebatkarekî mehê bû 6 hezar û 965 TL. Bi vî awayî sînorê birçîbûnê derket hezar û 70 TLyî ji mûçeya herî kêm a 4 hezar û 253 TL.