Pêşnûmeya rêziknameya medyaya civakî û rojnamevanîya înternetê, ya ku bi hinceta wê bibe sedema sansûr û gelek cezayan hat rexnekirin û nîqaşkirin, ji alîyê Komîsyona Edaletê ve hat qebûlkirin.

Pêşnûmeya Guhertina Qanûna Çapemenîyê û Hin Qanûnan ku bi hinceta "têkoşîna li dijî dezenformasyonê" hat rojevê û di nav rayagiştî de weke "qanûna medyaya civakî" tê zanîn, ji alîyê Lîjneya Edaletê ya Meclîsê ve hat qebûlkirin. Bi pêşnîyarê re, kesê ku bi agahîyên derewîn ku aramîya gel xera bike û bi eşkereyî belav bike, ji salekê heta sê salan tê cezakirin. Qerta çapemenîyê jî wê weke belgeya nasnameya fermî were pejirandin. Li gor pêşnûmeyê wê malperên nûçeyan ên înternetê jî di pênaseya kovaran de cih bigirin. Di rêziknameyê de malpera nûçeyan a înternetê, Midûrê Ragihandinê, Midûrîyeta Ragihandinê, Komîsyona Qerta Çapemenîyê, endamê çapemenîyê û berpirsê ragihandinê jî hatîye dîyarkirin.