Li taxek Amedê ya ku di erdhêjê de zirar dîtibû û beşeke wê ya mezin hat tehliyekirin, ji ber dizîya kabloyan welatî nikarin xwe bigihînin înternetê.

Yek ji taxên ku di erdhêjê de herî zêde zirar dît Taxa Şêx Şamil a Navçeya Baglar a Amedê ye. Piştê hilweşandina avahîyên ku gelek zirar dîtine, hema hema hemû kabloyên ku binesazîya înternetê pêşkêş dikin hatin dizîn.

Esnafên taxê dîyar kirin ku pirsgirêkên wan ên înternetê hene û gotin, “Em her roj li cîhên pêwîst digerin. Dibêjin 'Em ê di rojek an du rojan de werin û çareser bikin' lê qet nayên.

Dibêjin heta 6 mehan nikarin înternetê bidin. Her kes înternetê ji telefona xwe bikar tîne. Esnaf û şênîyên taxê mexdûr dibin.” Her wiha esnafan bi gotina 'Em çareserîya vê pirsgirêkê dixwazin' nerazîbûnên xwe anî ziman.